يمكن اتفرجت على فيلم سكس أو أكتر عشان كده بقى مفهوم الجنس في خيالك بالطريقة القذرة اللي بتفكّر بيها دي.
بمكن سمعت شيخ بيتكلم عن المرأة المتبرجة إنها مصدر الفتنة والفسوق فصدّقت بينك وبين نفسك ان المتبرجات يستحقوا التحرش والاغتصاب كمان .. مين قالهم يمشوا كاسيات عاريات في الشارع؟
يمكن كبتك الجنسي بقى متحكم فيك لدرجة انك تحاول تلزق في جسم اي بنت زي الحيوانات، مع العلم إن مافيش حيوان معروف بيتصرف بالوساخة دي.
يمكن ماعرفتش تتجوز عشان الفلوس والظروف، فكرهت الناس وقررت تتحرش بأي بنت كنوع من عقاب المجتمع الذي لم يراعي ظروفك .. عشان كده لازم المجتمع يستحمل مسئولية هيجانك.
يمكن شحنك المجتمع الذكوري انك تستبيح اي بنت في الشارع باعتبار وجود المرأة محصور فقط في الجنس. وهيه مالهاش حق غير انها تقبل تحرشك .. وتنبسط بيه، وتقولك عاوزة كمان.
يمكن تكون ناتج نظام فاشل منافق بلا اي أخلاق، ماحدّش علمك حاجة، فبقيت تفكرّ بنصّك التحتاني عشان لما الدماغ تكون فاضية، سهل جدا تصدق إن مخك هوه عضوك الذكري.
يمكن ماسمعتش حاجة عن النساء غير إن كيدهن عظيم، وامرأة العزيز اللي قطعت قميص سيدنا يوسف وشقته من ورا ولو كان سيدنا يوسف هوه اللي ابتدا كنا هانلاقي قميصه مشقوق من قدام. بس الرجالة بعد كده طلعوا اذكياء جنسيا وعملوا كل القمصان الرجالي مشقوقة جاهزة من قدام بس بزراير عشان يبقى سهل يفتحوها ويقفلوها على طول.
يمكن المجتمع صوّر لك البنت على إنها مخلوقة للفراش (السرير يعني) فبقيت تستنكر وجودها وهي ماشية جنبك في الشارع، فتتحرش بيها باعتبار أي مكان فيه بنت يبقى فراش (سرير يعني).
يمكن الثقافة الإعلانية المعتمدة على استخدام بنات مغرية، أو جزء من التربية الدينية الغلط المصرة على الجواز من 4 والتركيز والتفصيل في الأمور الجنسية تحديداً. الحاجات دي أعطتك دافع لاشعوري بالتفكير الجنسي بأي بنت، ولو كانت حتى ما وصلتش سنّ البلوغ.
يمكن ماسمعتش رجل دين قال ان التحرش حرام وغلط، واتكلّم بس في فسق النساء ومسئوليتهم الكاملة على اللي ممكن يحصل لهم. فبقيت تتحرش بيهم من غير حرج أو أي تأنيب ضمير، وأحيانا بتفكّر إن تحرشك بيهم أصلا نوع من أنواع الأمر بالمعروف والنهي عن المنكر.
يمكن اتربيت في شارع كلّ ما بنت تمشي فيه لابسة بنطلون، لازم معظم الشارع يبصّ على "مؤخرتها" تحديداً .. ويطوّلوا في البصة وكل واحد فيهم يتمنى لو كان البنطلون أضيق شوية، وفي الآخر تبرروا نظراتكوا الشهوانية بإن ده حق طبيعي ليكوا وترموا اللوم على البنت برضه.
ممكن تكون من نوعية لا تتأثر أخلاقياً ولا عاطفياً، بس بتتأثر جنسياً على أي شكل انثوي ولو كان مانيكان عريان في فاترينة. اعرف ساعتها إن حياتك ما عادتش انسانية لكن بقت تناسلية، وأكتر حاجة بتضايقك هي الهدوم عموماً.
ممكن تكون متجوز وعندك مراتك حلالك، لكن خيالك لسه خاين وانت بتبصّ على البنات وتتمنّى في نفسك انك تقضي معاهم أوقات حميمة بس لو سمحت الظروف .. وغالبا هاتعمل كده لو لقيت فرصة.
ممكن بنت تكون ماشية جنبك تقوم تدوّر بعنيك على أي حتّة جلد ظاهرة منها ولو حتى كان صوابع ايديها، الموضوع مالوش علاقة بالملابس على قد ما هو استعداد جنسي مسبق في خيالك انك تستبيح اي شيء عينك تقع عليه.
التحرش يتراوح بين فكرة عابرة مرورا بكلمة أو نظرة أو لمسة، أو حركة بذيئة في نص ثانية تلمس بيها البنت، ما تفتكرش ان حضرتك كده بقيت دكر ..وعموما البنت بتتأذي نفسيا من كل ده اكتر بكتير مما تتخيل.
ممكن بعد كده إنك تحترس أو تتحرش .. والمجتمع برضه ممكن يسيبك .. أو يقتلك .. لكن الحاجات دي حسابها الحقيقي مش بيكون على أيد البشر،، وأقل حاجة إن اللي انت عملته في اي بنت لازم هايحصل في اكتر حد انت بتحبه ... عشان كده سايبلك حرية القرار ... بشوقك ...
ودمتم
